Eine vo uns, dä huere Gadaffi!
seit dr George Clooney und riehrt in sim Kaffi

George Clooney
Eine vo uns, dä huere Gadaffi!
seit dr George Clooney und riehrt in sim Kaffi
George Clooney
Z vill Freyheit, das weiss doch jeede, isch saugföhrlig, dorum jetzt d Reegle:
D Reegle isch, wär guet ka pfiffe
hett s Sujet sicher nit begriffe
D Reegle isch, kunnt si rächt spoot
erhofft, erwünscht und meischtens root.
D Reegle isch, hört dr Boliviani uff
gitts in eim vo zwei Fäll Puff
D Reegle isch, sufft ein e Bier
stand aane und hilf em, und bestell no grad vier.
D Reegle isch, bim Wasser loo
unter freyem Himmel z stoo
D Reegle isch, wenn Männer pfyffe
hänns die wo iebe nit begriffe
D Reegle isch, wenn Männer drummle
und s kesslet, isch dr Zupfe umme
D Reegle isch, wenns vieri schloot
sinn alli usser eine z spoot
D Reegle isch, wirds kompliziert
villicht dr Perret involviert
D Reegle isch, d Larve kasch maile
bitz drüber gachiere, bitz ummedrafeyle
D Reegle isch, s dunkt ys verzwiggt
e Bonus für Verlüscht alles anderi als gschiggt
D Reegle isch, vom Gadaffi erfunde
ihr kaufet mi Öl und sinn sauglatti Kunde
D Reegle isch, dr Presidänt schribsch mit ch
das wünscht är sich fescht und schribt Stefan mit ph
D Reegle isch, dr René froogt Sache
wo Fuessballer mit Fuessbäll uffem Fuessballplatz mache
d Reegle isch, s goht nur in ei Richtig
dasch für unseri Zuekunft essenziell wichtig
D Reegle isch, im Gegeverkehr
hesch Körperkontakt, was wottsch denn no mehr?
D Reegle isch, trotz Subventione
duet sich dr Cortège nit so lohne
D Reegle isch, dr Buecher Urs
sott in Sujet-Klubschuelkurs
D Reegle isch, bim Comité
bisch als Bebbi nümm gärn gseh
D Reegle isch, mir sinn nit tschuld
die hänn halt nit so vill Geduld
D Reegle isch, im Foyer vom Drummeli
das wo s zämmehebbt, numme e Gummeli
D Reegle isch, ohni die Alte
hätt dr Stamm jetzt kei Larve – uffem Kopf – drfür Falte
D Reegle isch, am Bummel bim Guy
im Bluet vill Bier und Schnapps und Wy
D Reegle isch, am Donnschtig im Schlüssel
hett dr Baizer wenns brennt e dumme Rüssel
D Reegle isch, bim Marco Balmelli
im Waise kei Zeedel, in Fulham kei Strelli
D Reegle isch, Freyheit heisst jetz
alles z verbiete wo stört mittels Gsetz
D Reegle isch, liggsch uff em Schafott
fändsch Freyheit höggschtwohrschiinlig no flott
D Reegle isch, im Stamm vo de Bebbi
putz dr Gag-Ball mit Wasser und schmier d Peitsche mit Fett y